ភ្នំពេញ÷ អតីតបុគ្គលិកណាហ្គាវើលសល់ចំនួន ១០៨នាក់ប៉ុណ្ណោះដែលមិនព្រមទទួលសំណង ខណៈថ្ងៃនេះមាន ៣នាក់បន្ថែមព្រមទទួលដំណោះស្រាយតាមរយៈការសម្រុះសម្រួលរបស់ក្រសួងការងារ។

នេះបើយោងតាមសេចក្ដីប្រកាសព័ត៌មាន ចុះថ្ងៃទី៤ ខែកុម្ភៈនេះ ក្រសួងការងារកម្ពុជាបញ្ជាក់ថា ៖ «មកដល់ថ្ងៃនេះ មានអតីតបុគ្គលិកសរុបចំនួន ២៦៥រូប ក្នុងចំណោម ៣៧៣រូប បានយល់ព្រមទទួលយកការ ទូទាត់នូវប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន ដែលធ្វើឱ្យចំនួនអតីតបុគ្គលិកដែលមិនព្រម ទទួលយកសំណងនៅសល់ត្រឹម ១០៨រូប»។

ក្រសួងការងារក៏បានបញ្ជាក់ផងដែរថា មន្ត្រីជំនាញរបស់ក្រសួងការងារ និងបណ្តុះបណ្តាលវិជ្ជាជីវៈ បានធ្វើការពិនិត្យផ្ទៀងផ្ទាត់ ការទូទាត់ប្រាក់បំណាច់បញ្ចប់កិច្ចសន្យាការងារជាមួយតំណាងក្រុមហ៊ុន ហើយពិនិត្យឃើញថា ការទូទាត់ចំនួន ៤ចំណុច គឺបានត្រឹមត្រូវស្របតាមច្បាប់ និងលិខិតបទដ្ឋានគតិយុត្តិពាក់ព័ន្ធនឹងការបញ្ឈប់ពីការងាររួម។

ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នឹងត្រៀមខ្លួនដើម្បី ជួយសម្របសម្រួលពាក់ព័ន្ធនឹងការជួយស្វែងរកឱកាសការងារថ្មីសម្រាប់បងប្អូនអតីតបុគ្គលិកផងដែរ៕